Hööch im Chopf
Än grossi Ggöschschä, höch dr Chopf,
gäid äär dür ds Dorf, där aaräm Tropf.
Fallt är ggnuäg uuf und luägänd d Lüüt?
Är machchäd alls und chan doch nüüd.
Än aalti Foti weckt Komplex
«Da luäg, was bin i für än Hübschi gsin
und was i alls schon gmacht han, was i bin!
Uf Du mid allnä und mä lost uf mii.»
Hed diä än groossi Mäinig, was schii sii!
I tuän, as hätt i iri Woord nid ghöörd.
Schi dääwääg wichtig nään, ischt unärhöörd.
Üns Nani am TV
Am Abäd, wen i in dä Sockä
so ganz alläin am Fernsee hockä,
den däich i: Nani, gang in ds Bett,
wenn s doch nüüd bessrsch z biätä hed.
Dr Neni säid
Ä Fernseechaschtä bruuch i nid
und was s für eenli Ggreeti gid
zum Luägä bis an ds End dr Wääld.
Äs gäid ja albig nun um ds Gääld.
Üns Nani bim Hengrt
«I machä mi jetz uf di Bäin
und gaan so gschwünd as mügli häin.»
Ä bà, schi hengäräd noch lang
und höckt schi uf ä Schtuäl im Gang.
Uf dr Suächi
Zachchriias suächt naa schiinr Pfiiffä.
Schi liid ja uf äm Tisch zum Griiffä.
Jetz muäs är schini Brillä suächä.
Da ghöört mä nä zmaal liisli fluächä:
Was bin i für än aarmä Wicht,
i han schä ja zmitzt i miim Gsicht.
Nid luschtig
Luschtig häind sch äs im Väräin,
Chrischtä gwaggläd uf dä Bäin.
Ii Ggalööri alt und grau!
Ds gliichä däicht au schiini Frau.
Dr Öhi zum Buäbi:
«Für ds Prichtä git s gwüss noch ä chläinä Lohn.»
Dähäimäd chlagt ds Buäbi schiis Läid:
Da han i doch driimal „Näi tankä“ gsäid,
und gliich han i nüüd übrchoon.
Däär däicht äswàs
Är gäid hütt z Marcht und är trifft viil Lüüt.
Aschtatt än Gäldseckäl chauft är nüüd
und däicht: Was nützt mi das uf dr Wääld,
än grossä Gäldseckl und käis Gääld .
Au dr Naachpuur gäid z Marcht
Hütt ischt är uufggregt, macht käi Schpäss,
den äär gäid i schiim Sunntigshäss
ab uf di Baan und den gä Chur.
Schi vorhär wäschschä? Näi, käi Schpuur.
Är wil zum Gwafför, z Marcht, in d Schtadt.
Schon bin dr Gwaffös gäid s nid gglatt.
Denn schi ärgriift ä Säiffäfläschschä:
Mä sötti gwüss dr Chopf zerscht wäschschä.
Vor alläm da diä Grattä
an dä Paggä.
Schpiägäli, Schpiägäli
Was machischt mid dm Schpiägäl in dr Hand?
Du bischt doch wol di Hübscht im ganzä Land!
Du hescht di uufgätaggläd wiä än Bruut,
mä gsiäd ja nümmä nun äs Fläckli Huut!
Witt du den jedä Bützl übrchläbä?
Ischt d Schminki fort, den chascht äswas ärläbä!
Ä waari Gschicht
Än Püüri alläin und di Puurnig nu chläin.
Zwäi Prüäffär vam Amt söttänd d Mischtplattä mässä,
doch Mässggreet wa sch bruchtänd häind sch tummrwiisch käin.
Än drittä hed gaar noch schiin Rächnr vrgässä!
Di zwäit waar Gschicht
D Marie und dr Chrischtä schlaaffänd fescht.
D Sunnä schiint noch lang zum Fänschtr iin.
Da ärwachäd d Marie: Gschlaaffä hescht,
z eerscht ämaal muäs ds Beriläsä siin.
Nu, was ischt? I chumä nid abschtett.
Ischt den noch nid Morgäd, mä gsiäd nüüd,
O herrjee, was däichänd wol au d Lüüt,
äs nachtäd eerscht, jetz wäidli uuf in ds Bett!
Dr Päischtr Neni schidigäd
Du taarfscht dämm Buäb nid Lugnr sägä,
wen äär nun äimaal gglogä hed.
«Näi, du hescht gglogä!», häisst s den äbä.
Drumm machchäd jetzä Fridä, beed!
Üns Nani bim Gglettä
Was ii miär iingäbrochchäd han!
I wetti, d Aarbäd weer gätàn.
Diä Hemtr sind ja vollä Rümpf!
Guät, gglettäd mä nid au noch d Schtrümpf!
Fisch
I han nä so gäärä ganz frisch uf äm Tisch,
doch sälbr gä fischschä, säb wett i käi Fisch.
I chönti uf käi Fall äs Fischli ärschlaan.
I neemi s vam Angl und lüäsi s lan gaan.
Diä tondrs Mäitiä
Di Pfiiffä gschtopft, dr Neni schlaft.
Gschwünd Fingrnaglpulvr drin!
Churz nachhär, waa dr Neni pafft:
«Pfui Tüüfl, das sind d Mäitiä gsin!»
Äigämächtig
Schi tuäd wiä schii will uf äm Fääld,
und au dähäimäd zellt schii ds Gääld.
Zmäischt hed sch au di grööscht Guugä.
I glaubä, schi hed s gsugä.
Äsoo hed mä s gsäid
D Mammä ischt mit irär Nina
churz zum Hengert bin dr Trina.
Nina luäg! Äs gid ä Schnittä,
Immihung und Schmalz und Pittä.
Dankischt nid? Wiä lang das wärd!
Ds Chind säid: Isch schä nid dr Wäärd.
Uuf und äbä
Wämm gliicht diis hübschä Popi wol
mid schiinä Päggli gchnütschäd voll?
Wen s noch än Glatzä hätti,
weer s grad preziis dr Ätti.
Üns Popi
Üns Popi hed in d Windlä gmachchäd,
mä gsiäd mä s aan, äs schtraald und lachchäd.
Den däich i, jedi Frau und jedä Maan
häind s früär au nid andrscht ghan.
