8.4 – Arbäd

Aalti Walser

Viil mee as Schaffä chenänd sch nid.
Im Jahr äs Feschtli, wenn s schi gid.
Wäär gäid den schon gä wandärä
von äinäm Tal in ds andärä?
Mä gäid nid gäärä us schi uus,
gross Redä haaltä weer än Gruus.

Läärnä schaffä

Schon früä muäs ds Chind ä Rächchä füärä,
bim Bachchä au än Täig aarüärä.
Niä muäs mä übr Lengwiil brüätä.
Im Herbscht gid s z laubä, z züünä, z hüätä.
Am ringschtä is s den uf äm Schtuäl
im lengä Wintr in dr Schuäl.

Aab gan Tanill

Di mäischtä Landchind müässänd läärnä schaffä,
schi chönänd nid dr ganz Taag ummrggaffä.
Dr Papä säid, wiär gaand jetz gan Tanill,
mä wäis hütt nid, was ds Wättr moorä will.
Wen ds Häu ärnassäd, is s den schweer zum traagä,
uf moorä z waartä, törrf wr gwüss nid waagä.
Än grauä Häuschtock nützt ja niämäd nüüd,
däär Schtaub ischt ungsund für di Tiär und d Lüüt.

Folgä läärnä

Chomäd nid innr mid mischtigä Schuä
und machchäd doch pitti noch d Huustüür zuä!
I bin jetz am Bachchä und muas di Ziit nutzä,
Sus chönd iär den sälbr üns Schtägähuus butzä!

Ä vrloornä Taag

Dr Pilgr gäid gän Bethlehem,
dr Puur gäid uus gä Chur.
Für käinä ischt diä Räis bequem,
di Ziit rüüt nun dr Puur.

Was für än Bäiz!

Är meet und tengläd, wetzt und meet,
diä Chatzäschwänz sind hert wiä Dreet.
D Maschinä chönti s bessr
mit suubr gschliffnä Messr!

Vee iischpannä

Ä Mäntschä muäs läärnä ä Schlittä ziän,
schi wäis noch nid wiä und will albig fliän.
Das Blegr tuäd schtettig, äs bockäd und schpeert,
äs hudäräd gwüss beedi Lattä und ds Gfeert.

Früäsummr

Jetz luägäd doch zum Fänschtr uus!
Dr Naachpuur meet schon ob äm Huus.
Den müässänd wiär in ds Wisli iin,
wiär weländ nid di Letschtä siin!

Äs Reetsl

Är machäd Schtaub so hööch wiä ds Tach,
är machd än tondärlichä Chrach,
är schtiicht naa Öl und naa Benzin.
Wäär chan das läidä Unghüür sin?

Dr Blaasr!

Schiin Blaasr gid är nümmä fort,
är blaasäd ds Häu us jedm Boord,
doch schtiicht r, schtüübt und machchäd Chrach
und haltäd wiitum alli wach.

Dr nüüscht Chrachchbruädr

Di jungä Puurä chönd nid meeä, tenglä, wetzä,
drfüür van äinr Aarbäd zun dr neechschtä hetzä.
Aschtatt ä Sägäsä häind sch nüüärdings dr Trimmr.
Dr Chrachch, dr Gschtank, dr Schtaub,
diä chomänd nun noch schlimmr.

Dr Schwiichochch

Im Abwäschschwassr taarf käi Säiffä siin,
mä nutzäd s nachhär für dä Chochch für d Schwiin.
Dert driin heds Schwiinhärdöpfl, allärläi.
Das schmeckt! Am Fuätrtroog, da gid s äs Gschräi.

Arnika und Edelwiiss

Am Montalin, ganz hööch am Grat,
meed dr Neni früä und schpaat.
Arnika und Edelwiss
hed s dert dobnä in dr Wis.
Im Wintr frisst ds Vee ds Häu mit Luscht,
Äs hed däär bsundr Bäärgwisguscht.

Ünschi Mammä

Im Büro schaffä, Poscht vrtraagä,
losä, was d Lüüt weländ chlagä,
chochchä, wäschschä, und wenn s gäid
bim Häüä hälffä, is s nid läid.
Am Sunntig oorgälä sächzg Jaar,
denn d Organischtä, diä sind rar.
Äs eelends Gschprüng uf derä Wääld.
Schi schetzt s äsoo, nid wägäm Gääld.

Van Cafräissä aab in ds Caschtìälr Tobl

Schi hed erscht grad äs Chind gäboorä,
ggmäind hed sch, schi übrchomi s moorä.
Dr Maan ischt wiit am Bach am Saagä.
Dert aab mag schii Zmittaag schon traagä.
Dr Saagr säid, mi liäbi Frau,
gäid s diär den guät, dm Popi au?
Mä chan diä Fräud gar nid ärmässä.
Und erscht noch diä am guätä Ässä!

Schaffä, schaffä

Miin Papä ischt albig ä Chrampfr gsin
und offä für Nüüs und für Unbekannts.
Är hed niä nüüd gmachchäd äsoo zum Schiin.
Und nüüd nun zur Hälfti, denn wenn schon, ganz.
Zur Uusnaam hed s ättä äs Spässli ggään,
Säb hed är schi trotzdämm den nid lä nään.

Miin Papä ärzelld

Dr Papä isch noch draan am Häu abladä,
waa ünschä Oggs erscht us äm Bäärg gäzogä hed.
Är flickt am Schlittä gschwünd ä chläinä Schadä.
Är muäs jetz ds zwäit Mal faarä, sus chund s schpeet.
D Huushältäri vam Fuärmä Hans schtäid dert.
Schi gsiäd, für ds Tiär ischt so än Aarbäd hert.
«Gibt s denn noch Milch, wenn s fleissig schaffä muä?»
Ach, guäti Frau, das ischt än Oggs, käi Chuä!

D Mammä ärzelld

Zwiiliächtigi Lüüt sind schon früä dür ds Tal iin.
Und niämäd ischt va nä bägäischtäräd gsin.
Ä Schelm hed z Arosa dr Pfäffr bald gschmeckt,
doch hed mä nä dertä nid sofort äntdeckt.
Är gäid an äs Lauffä, so gschwünd ass nä träid,
und schtild noch äs Velo, wa äifach da schtäid.


Nun z Päischt uf dr Poscht hed s äs Teliffon ghan.
Da lüütäd äswäär uf das Teliffon an.
Und d Mammä nümmt ab, s ischt än Aaruäff va Chur,
schi siiänd dm Schelm jetzä hert uf dr Schpuur.
Dr Lantjegr söl gschwünd an d Straass aab gä schtaan,
dr Schelm dert ärgriiffä und nümmä lan gaan!


Käis Velo ischt choon, nid äs Auto, käis Tiär.
Dr Lantjegr mäint, jetzä chönänd sch den miär!
Schon früä an dr Wis hed dr Schelm schi gädäicht:
Da schtiigi vam Velo, noch vor as mi präicht.
I laan das Vehikl am Schtraassärand schtaan,
van daa wil i häimli in ds Brättigä gaan!


Dr Schelm ischt vrschwundä, nüüd hed mä mee ghöörd.
Mä hed nä vrgässä, und niämäd hed s gschtöörd.

Ds Evali va Seewis

Wär hed au ds Evali als Würti in Partnun nid gchend!
Im Summr hed s viel Wanderslüüt ghan in däm hübschä Gglend,
und diä häind gäärä übrnachtäd undr iräm Tach.
Am Suntigaabäd sind den au di Ledigä vrbii.
Das hed dem Evali gaar nid gäpassäd wägäm Chrachch:
«Da chön si eerscht am Zwölfi und den tüänd si no wiä d Schwii!»

Bin dr Bäsi und bim Öhi

Bin irnä hed s Lädä, gwüss hundärt und mee,
bin irnä gid s jedä Taag Chuächä und Tee.
Zun irnä gän huusä, säb tetti mr wee,
bin ünsch hed s halt Allmäinä, Wisä und Vee.

Luschtigs Zigüünerläbä

Im Summr, wenn s hübsch aabr ischt,
den wett i z liäbscht Zigüünr siin.
Im Wintr, wen alls gfroorä ischt,
den is s fürdussnä nümmä fiin.

Ä Sisyfusaarbäd

Dr Sisyfus, där tröölt schiin Schtäin
uf ds Mattlischhoorä ganz alläin.
Fascht z obrscht chund är mä z äntgaan.
Drum faad är widrum dunnä aan.