Üns Nani chlagt
Lösäd guät und bliibäd wach,
sus schtäid s schlächt um ünschi Schpraach.
Schi zärgchiid wiä Schtäin zu Sand,
bis s schä nümmä gid im Land.
Was ischt poschtä?
I bruuchä Brod, Moscht, Naadlä, Fadä,
drum gaan i jetzä in dä Ladä.
Au bruuch i Milch und Määl zum Bachchä.
Waa poschtischt du denn diini Sachchä?
Näi, näi, i gaan nid uf di Poscht.
Denn dertä git s käis Määl, käi Moscht.
Schtäckä und Schtöck
Zeerscht träich i alli Schtöck am Huus,
den gäit s mid Schtäckä uuf und uus,
das chund sogar an Kürsli gleerd.
Wäär s umkeert machchäd, d Schtäckä träicht,
di Graniumschtöck an d Agslä häicht,
macht gwüss äswàs vrcheert.
Ds Enkäli freegäd
«Säg, Nani, säg, warum häisst s z Züri flüügä?»
Wär säid das, Vreni, waa hescht du das ghöörd?
«Am Fernseh, chascht di sälbr übrzüügä.»
Da ischt nüüd z machchä, au wen ünsch das schtöörd.
Am Fernseh redt mä säältä ünschi Schprach.
Diä liid fascht ds ganzä Jaar dert braach.
Nid värschtandä
Än Bsuäch chund us äm Underland,
mä redt so über allerhand.
Än gschickti Mäitiä ischt äus Vreni,
ärweent so näbäbii dr Eeni.
Doch diä rüäft, schickä chascht mi nid,
das Päckli cheemi nid grad wiit.
Was säid di Poscht? Das ii nid lachchä.
Dr Eeni würt äs Schpässli machchä.
Chunscht
Üns Naani freegäd: Was ischt Chunscht?
Miär schiint s, va Chunscht han ii käin Dunscht.
Än Tolggä uf äm Blatt Papier?
Ä Chreechzischtimm, äs aaräms Ggliir?
So mengi bildänd schi wol iin,
schi chöntänd ggwüss au Chünschtlr siin.
Bööschi Ziitä
Gchuum luäg i da zum Fänschtr uus,
flüügt grad äs Unghüür rund um ds Huus.
Tüäd alli Löchär zuä,
sus chönti s innr choon!
Waa füärt das au noch hiin,
das ischt gwüss ä Schpion.
Näi, näi, da sind di nüüä Schuä ja schon,
diä hescht du hüt grad erscht lä choon.
Übrflüssig
Wen ds Poschtauto ooni ä Fuärmä faart,
den hed mä doch grad au ä Mensch ärschpart.
Und waas machänd den di ärschpartä Lüüt?
Am Tuumä chönd sch suugä, den z tuän gid s nüüd.
Chlopfmusig
Pumm, pumm, pumm, drzuä äs Gschrääbl,
in dä Oorä git s mr Chrääbl.
Nüüd für ds Gmüät, ä Näärfäsaagä,
lang chan ii das nid ärtraagä.
Üns Naani schüttläd dr Chopf
D Mammä schtoosst im Wagä ds Popi übr ds Land
und schi träid ä chläinä Bildschirm in dr Hand.
D Vögl pfiiffänd, doch vom Popi chund käin Ton,
d Mammä redt an äim Tromm mid dm Teliffoon.
Zeerscht bin dr Mamma bättlä
Näi, Smartfoon übrchuscht du käis.
«Di andärä häind alli äis!
Wen ii doch au äis hätti!
Den freeg i halt dr Ätti.»
Dr Erbvettr
Än Vettr us Amerika
chund übr ds Meer und ischt jetz daa.
Är bliibt drii Wuchchä odr soo,
den das värmög är sowisoo.
Är ischt au aanggläid wiä ä Lord
und faard än helisch tüürä Ford.
Mä gsiäd, was är für äinä ischt
und wäis, das ischt nid Gitzimischt!
Waa s den an ds Erpä ggangä weer,
sind schiini Kassäli murz leer.
Jörlisch Utti
Im nüüjä Jaar bim Poscht vrtraagä
säid Utti: «Muäscht di hütt au blaagä,
i will dr gschwünd än Ggaffi machchä!»
Bim Triichä ischt miär nid zum Lachchä.
I rüämä trotzdämm, – triichä uus.
«Uf äim Bäin gäischt nid us äm Huus».
I schick mi driin, laan nüüd lä schtaan.
Erscht schpeetr hed schi uussr gschtelld,
was Utti zu mä Gaffi zeld:
Schi leerd ä schwetti Gäismilch dran!
In Usabuuf
Dr Chrigl säid: «Wiär gaand gä meeä
uuf in das läidä Boord, das geeä,
in Usabuuf, grad naa Zrfaaltä.»
Ä fröndä Nammä und än aaltä.
Doch d Mammä ghöörd s und lüpft nisch druuf:
«Das ischt ä Schpass: – in – uus – aab – uuf,
däär Nammä ischt ärfundä, d Wis gid s nid.»
Wiär sind dm Chrigl in ä Fallä ghiid.
Dähäimäd grüblä
Du söttischt undr d Lüüt!
Nun hockä daa ischt nüüd.
Du bischt doch froh um jedä,
wen t chascht äs bitzi redä
und freegä wiä s mä gäid,
wiä äär schiin Burdi träid.
Wol niämäd chan gä sägä,
är häi nun Glück im Läbä,
so, das mä für schi däicht,
so böösch hed s mi nid präicht.