9.07 – D Wassrhüttä

Erinnerungen von Töni am Bach (Töni Engel)

Ort: Strassberg Fondei, Sommer 1927

Dia Wassrhüttä steid am Strass-
bärg zwüschäd Xandrsch Utisch
und Antonisch Huus, im Töbali.
s ischt as gäzimmräts Gebü van
3 uf 4 Metr und ättän 2 Metr
Höhi, am Gibl mögans 3 Metr
syn. Z Bächji lauft dür d Hüttän
ab uf dä Stafl. Dr gross Brunnän
ischt ättä 4 Metr lengä und ischt
usama Rundholz usghölt, ättän
80 bis 90 cm Dürrmässr. Ds Wassr
van dr Hüttä chund 100 Metr
wiitr dobna usm Bodä. As ischt
an Quellä wa z ganz Jahr glich vi-
il Wassr hed und di einzig wa für
alli Strassbärgr Hushaltigä sichr
und subrs Wassr gid. Dia Quellä
ischt uf ünschm Hennbüal, da
hättänd ünschi Ahnän scho lang
chönnä Wassrziis verlangän, abr
as sind äbän Englä. Wemmä
z Nüischtä ärfahra will, muass mä
in d Wassrhütta. Da heds albig 3
bis 5 Frauän binänand. Da wär-
dänd Lugänä, Grüchtji und Wahr-
heitä gred daschi di Trämä van dr
Hüttä fascht beuggänd.

I bin as siebäjerigs Buabi und nü-
man ätän amal as Chessäli und
gang dür int Wassrhütta gan losä
was dia Wybr als zämmäredänd.
Da seid Elsi zun Gretän: «I han
ghört sägän das eua Petr das Huus
am Teil amä Undrlendr värchaufä
welli. Där wetti da as Feriänhus
irichtä.» «Ja und? Darf är das
nid?» «Schon, abr wenn den da
derä jungä Mäitiä mit den chur-
zän Rögg umrlaufänd, ischt das
nid guat für ünschr Pürscht.» «Bi-
warisch dr tuusig Gott wa läbscht
den du?» «Und wenn da dri dera
jungä Tirolrchnächtä am Strass-
bärg sind? Ischt das bessr für
ünschi Mäitiän?»

Ds Anni ärzelt
dasch in dr Nacht hei müässän
ufstan und dür in dä Stall. da
hei an Geiss unheimli gmekrät.
Wiasch zum Stall chon sii,
heisch gsehn aswas fortspringän.
Ja as sii wahrschinli a Fux gsinn.
Wiasch dua widrm ins Hus dür
sii, heisch dänä bim Spychr aswas
wyssäsch gsehn. Das sii da umr-
gloffän. Utti meind: «Ja hescht
den ghein Angscht ghan?»
«Schon, abr herrschaft seitän was
hani den wellän?» Jez heisch
doch dr Gufrgeischt gsehn, das
chan nüd andrscht gsii siin und
där ischt ja kein Böscha.

Ds Dorli
seid schi sii dajez indr Rüti dinnä
gsin. Da heiänsch as rächt lutsch-
tig ghan. Dr alt Campaniari hei
ärzelt wia schini Mammä für dä
Wintr Hosä gmachäd hei us Grü-
schä-Seck. Das heimä ja undr
dennä lengä Rögg nid gsehn. Un-
nä heiänsch zwei Löchr gmachäd
und obnä midrä Schnuar zämän-
gäbundä.

Uti meind gescht hei dr
chlein Hansi inra Schwynteubi di
ganz Chuchi zämängschlagän. Ja
deschgatig Lüüt sind halt unbe-
rächänbar. Gretän seid schi hei
ghört sägän dr Xandr welli in dr
Seemattä as Hüüschi ufstellä, är
chüni ja nid albig im Stall schla-
fän. In dr Haldä dinnä heiändsch
ds alt Hüschi abgäbrochän, äs hei
zwar nümmä viel abzbrächän gän,
schi sii scho fascht am Bodän gsinn.

Gretä hei geschtr
d Chäsig ghan, den heisch dam
Senn müassän z Maränd machän.
Ja schi heis ganz grusäd. Das sii
den an Uflat mit ässän. Ds Elsi
meint, das dr grusig rychän Brua-
drsch Christänsch Christän di
Prüafig für dä Vehhändlr gma-
chäd hei. As güangi noch viel
wiitr, abr jez muassi hürän. Diä
Wassrhüttän ischt z reinscht In-
formationszentrum. Dia paar Sa-
chän hani nu inrä Halbstund uf-
gschnappät. Was da eim Tag zäm-
mächund geb an grossi Zitig.