gang
wenn d gaa wit
muascht gaa
nit zruggheba laa
nüma la nööta
eifach zun diar staa
und looslaa
zum gaa
Begägniga
Schi träffend albig
zmitst ins Häärz
schi machend betroffa oder froo
Schatta und Liacht
in all irja Farba
Begägniga träffend di dört
wa du diar sälber begägna sottischt
zmitst in diim Schatta und Liacht
zmitst in diim Häärz
Multikulturell
guat tönt s scho
wema cha säga
miar sind alli gliich
du und ii
miar heind au nu Huut über da Chnocha
di eint ischt vellicht dicker
oder hed än bits mee Faarb
miar heind ja alli äs Häärz im Liib
ds einta än bits grösser
oder mindeschtens so weich
guat tönt s scho
wema cha säga
miar sind alli gliich
du und ii
miar heind ja alli ä Verstand
dr eint luagt än bits wiiter
oder hoffentli bis i schii Seel
aber grad dört
tönt s de halt anderscht
diini und miini Huut gältend nit gliich
diis Häärz red gäged mii Verstand
und drum
wärde mer nia di gliicha siin
du und ii
tuan ättes
äs geebi sövel
wa ii wetti
und de chann i s nit
äs geebi sövel
wa ii sotti
und de mag i s nit
äs geebi wenig
wa ii müassti
und de tuan i s nit
häärstaa muass ii au für d säb
wa ii nit tuan
Zeichä
wenn
i di hüt gsian
truurig sii
sa weiss i nit
i s
ä stumma Ruaf
na Hülf
oder
äs chlaars Zeichä
für Dischtanz
hätt i s de
früajer gwüsst
oder
sottischt du s
halt lärna säga
wenn i mee
van diar wussti
müach i vellicht
weniger lätz
Glück
än Blick
im Schwick
zmitst ins Häärz
än Augablick barlöötigs Glück
truua
truua
chann dr nit
aber
vertruua
Verletziga
warum
bin ii verletzt
wenn
du miar
än Tür van diar
vor dr Nasa zuaschlascht
han ii nit au
dera Rüüm
wa i dii
nit iilaa cha
wenn
wenn i chönnti
wia i wetti
cheem i jetz zun diar
wenn i teeti
was i wetti
losst i uf ds Häärz i miar
will i tuan
was i sotti
bliib i allei mit miar
will i nit chann
wia i wetti
tuan i liaber nüüt
langsam
chunnt ma feig äso
Gägasetz
eigentli
simmer wia Wasser und Füür
Tag und Nacht
Sunna und Räga
eigentli
wemmer ja kei Funka versprüja
kei Stund verliara
und kei Sunnastich bercho
eigentli
wusstemer ja
dass ds Füür ooni Wasser alls verbrennt
und das nüt as Sunna nu Wüaschti geebi
und doch
staamer so ungära im Räga
und fürchtend nüüd mee as d Nacht
eigentli eigenartig