midenand
us da
verschidenschta Eggi
chomma mer
äsia halt zäma
und de heisst s
ä Wäg suacha
midenand
über Stock und Stein
nit eifach
aber vellicht
stercher
underwägs
underwägs
uf mä Wäg
du hescht na nit uusgweelt
d Weicha het diar än andera gstellt
underwägs
uf däm Wäg
hättischt äsia am liabschta gcheert
z viil Steina heind diar dr Wäg verspeert
am Ziil
va däm Wäg erscht
het s di ds Wichtigschta gleert
Schiini Wäga sind nia vercheert
Spuura
harmonisch gschwunga
düür und häär
und rächtsumgcheert
graduus geit s nu sälta
um z kurvna chuscht nit drumum
ob
du da frömda naageischt
oder
di eigna hescht gfunda
spuurloos
geit keina dür d Wält
Stiigiga
uufstiiga abstiiga
umstiiga uusstiiga iistiiga
uufstiiga uf dr Erfolgsleitera
sa gschwind as mügli
zum ja nit müassa
i miini Abgründ abstiiga
oder
eifach nu umstiiga
us ma gwoneta Trott
will
mer ds Uusstiiga z nietig ischt
und mer ds Nüüiistiiga Angscht macht
uuf und abstiiga
ii und uusstiiga
wenn i mii da nu nit no verstiiga
Gsundheit
Gsundheit
chascht dr nit erchaufa
mit ä ma Flick da
und ä ma Pflaschter dört
Gsundheit
git s nit so uf Raata
will du grad ämal
Derwiil hättischt
ättes für scha z tuan
Gsundheit
ischt keis Spiel
am runda Tisch
und diina Iisatz
spillt kei Rolla
wil für d Regla
än Andera
zuastendig ischt
begleitet
bischt Du
där Hirt
wa mit dür miini tüüfschta Schluchta geit
bischt Du
dia Hoffnig
wa Liacht i miini Düüchli treit
bischt Du
dia Chraft
wa miini Engscht verwandlet in Zuaversicht
bischt Du
där Fels
wa miir Hand äs Hebi ischt
Du bischt
Tod
de
wemmer meinend
zmitst dinna z staa
im Läba
schlaascht Du
äs Loch
än iischiga Luft
blast nisch in ds Gsicht
und
as chunnt usinnig chalt
in ünsch
is drum
wil du wit
dass miar
wider lärnend
zämarücka
und nisch
Chraft und Wermi gä
dr Chreis chunnt
albig chleiner
Abschiid
gaalaa
müassa
alls
wo s doch no so fescht verhebt
gaalaa
müassa
alls
und ä Stuck van diar dermit
gaalaa
müassa
alls
nei
ds Band var Liabi nit
Veränderig
Läba
Bewegig
Veränderig
ganz läba
di guata und schlächta Taga
bewegli bliiba
nüüi Wäga gaa
Veränderig zualaa
scha aanää
läba
nit stärba
am lebendiga Liib