Gsichter
äs jedes Gsicht
mit schiir eigena Gschichti
hinder jeder Fassada
liit verborga ä Seel
wenn d schä wit verstecka
sa fallt diar das nit schweer
wäär het scho dr Wiil
schi z erstella
und luaga wia s uusgsiat i miar
wär will scho gära erchenna
das hinder äm Glanz
alls abglöscht ischt in diar
wenn du aber wit
dass ma dii cha verstaa
de muascht zerscht sälber
hinder diini Fassada ga
und muatig und eerli
zun diir Gschichti staa
Muater
ä Muater
het kein Terminkalender
irja Ziit
ischt nia limitiart
schi ischt eifach
mee und minder
albig und für alls
prädeschtiniart
gää
i vergiba miar nüt
wenn i
diar ättes giba va miar
i vergiba miar nüt
wenn i
diar eifach vergiba
i vergiba miar höchschtens
d Mügligcheit
diini Fründschaft z berchoo
verloora
verloora gganga
in dä eigna viar Wend
erstickt
im aalta Dräck
kein Bäsma und kein Blätz
bringt nä awägg
höchschsti Ziit
das d uf d Suachi geischt
naa diar
di Ander
i will
au ämal di ander siin
as dia
wa albig nu lächlet
di fründli liablich und gschickt
dia zum Fürzeiga ischt
ghoblet und fiin gschliffni gnueg
da han i kein Angscht
dasch äswa aanegga tuat
I muass
au ämal di ander siin
dia wa rääget und truuret
wa muulet zöörelet und stampft
dia zum Fürzeiga ischt
ghoblet und fiin gschliffni gnuag
da han i kein Angscht
dasch äswa aanegga tuat
duu
wa tüüf dinna versorget bischt
miis ungüabts verletzlichs
Stuck Seel
dii möcht i zualaa
duu bischt än Teil va miar
eggig eerlich
und
kein bits heel
Rümpf
miini Rümpf
und diini
heind nit di gliich Gschichti
drum
git s au keis Rezept für ä Salbi
wa alli wider glettet
zum Glück
nu Maschgälä
tragend kei Rümpf
dr Massstab
i laa mi ungära eifach mässa
an all däm Glitzer und Glanz
dia hübschischt und türschta Häässi
sind nu miini Schala
im täglicha Tanz
i laa mi ungära eifach iireija
nu so uf euja erscht Blick
miini Fassada tarf eu nit glengga
schi ischt miis usicherschta Stuck
i laa mi ungära eifach berächna
na Siida Kaschmiir und Nerz
keis Marka oder Priisschild
zeigt eu dr Wäg i miis Häärz
Dischtanz
eigentli
feelscht mer
aber
säga tarf i s nit
Wil i gspüra
dass du
fort bischt
heb i mi da zrugg
fortgaa und
wider heicho
muass a jeda sälber wella
us schiim Entschluss
zruggheba
wee kleinlich
looslaa
müachi starch
eigentli
feelscht mer
und
hoffa tarf i ja no
wägselhaft
alls
cha ma wägsla
d Huusig
d Stell
ds Auto
d Aasichta
dr Partner
d Haarfarb
ds Hääs
alls
um und um
nu
mit ünsch sälber
müassa mer all Tag
z Gang choo
unuuswägsli
än Trom
willkomma i miar
du gscheichta bedingigsloosa Trom
us miim Wunsch di z heba
git s us diar ä Wision
dii Form chunnt albig chlaarer
und diis Bild berchunnt Faarb
wenn i will
bring i s sogar fertig
dass us diar ä Würklichkeit git
alls us ma Trom
Würza Züün Flügel
mii Würza
sind ds Hebi für miis Siin
euji Züün
zeigend miar dr Raama
ganz fiin
aber mii Seel
bruucht äsia Flügel
zum allem entflian