Dr Neni gschpürd
Dr Neni schlärggäd, Wintr, Summr
in schiinä Militeerschuä ummr.
Schuäbendli hed s käi rächti dran,
will äär schi nümmä pückä chan.
nidschi
Mä merkt, wiä s mit dm Aaltr nidschi gäid,
dass mid dr Gsundheit nid zum Beschtä schtäid.
Mid obschi gaan, feelt äim gar gschwünd dr Schnuuf,
drum gaan i jetzä liäbr aab as uuf.
Di Ziit gäid
Albig gschwündr gäid di Ziit,
Aalti mögänd nümmä mit.
Churz und chürzr chund dr Schritt,
bis s käin äinzigä mee gid.
Dr aalt Puur
I bin än aaltä Maan
und chan fascht nümmä gaan,
nid rächchä und nid meeä,
mi hofäli mee dreeä.
Zandriäggi
Dm Simmi lottäränd di Zend,
dass alli schon va wiitm gseend.
Är hed drvan nun noch äs paar.
Den asä jung, vor viilnä Jaar,
hed mä di Ziit halt andrscht gnutzäd
und gwüss gar niä di Zend gäbutzäd.
Äs aalts Päärli
Wiär läbänd schon sit Jaarä midänand
und gaand uf Wägä nümmä Hand in Hand.
Wiär häind nisch lengschtä anänandrä ggwend,
äsoo, das mä schi gägäsiitig chend.
Wiär müässänd nisch nu wägä nüüd nid schtriitä
und hebänd Soorg zun ünschnä altä Ziitä.
Nid vrwent
Mii Frau und ii sind nid van hütt
und nid vrwent wiä mengä Grütt.
Wiär ässänd, was im Tällr ischt
und wärffänd s nid uus uf dä Mischt.
Wiär leend nid ds Liächt für nüüd lan brennä,
wiär gaand gä liggä mid dä Hennä.
Compiuutr odr derä Züüg,
das bruucht nun Schtrom und säid ünsch nüüd.
Bäsi, wiä hess?
Dalétscht: Wiä hess, wiä gäit s dr wol?
Ja däich, i chan fascht nümmä gaan.
Den guäti Bessärig, läb wool!
Schon hed r alls vrgässä ghan.
Und hütt: Wiä hess au, gäit s dr guät?
Ja, wiä dalétscht, i han root s Bluäd.
Mid häingaan däicht är: Unärhöörd,
asoo än Antwoord hed mr ghöörd!